បន្ទាយមានជ័យ៖ ទណ្ឌិតនៅក្នុងពន្ធនាគារខេត្តបន្ទាយមានជ័យជិត ៥០នាក់ ត្រូវបានបន្ធូបន្ថយទោស នៅក្នុងឱកាសពិធីបុណ្យចូលឆ្នាំថ្មី ប្រពៃណីជាតិខ្មែរ និងបុណ្យវិសាខបូជា។

អភិបាលរងខេត្តបន្ទាយមានជ័យ លោក ង៉ោ ម៉េងជ្រួន បានដឹកនាំកិច្ចប្រជុំស្តីពីការបន្ធូរបន្ថយទោស និងលើកលែងទោសដល់ទណ្ឌិត ក្នុងឱកាសបុណ្យចូលឆ្នាំ ប្រពៃណីជាតិខ្មែរ និងបុណ្យវិសាខបូជា ឆ្នាំ២០២៣ នៅព្រឹកថ្ងៃទី០៩ ខែកុម្ភៈ ឆ្នាំ២០២៣។

ប្រធានពន្ធនាគារខេត្តបន្ទាយមានជ័យ លោក អ៊ុង ស៊ីផាន បានឱ្យដឹងថា ទណ្ឌិតចំនួន ២២នាក់ ត្រូវបានបន្ធូរបន្ថយទោសក្នុងឱកាសបុណ្យចូលឆ្នាំប្រពៃណីជាតិខ្មែរ និង២៤នាក់ទៀតក្នុងបុណ្យវិសាខបូជា ក្នុងចំណោមទណ្ឌិតដែលជាប់ឃុំក្នុងពន្ធនាគារខេត្តបន្ទាយមានជ័យសរុបជិត ១៦០០នាក់។

ប្រធានពន្ធនាគារខេត្ត លោក អ៊ុង ស៊ីផាន បញ្ជាក់បន្ថែមថា ការបន្ធូរបន្ធយទោសនេះ មានរយៈពេល៣ខែ ៦ខែ និង៩ខែ។

លោក អ៊ុន ស៊ីផាន បញ្ជាក់ថា ពន្ធនាគារខេត្តបន្ទាយមានជ័យ បានអនុវត្តនូវតួនាទី ភារកិច្ច ក្នុងការអប់រំ កែប្រែ ស្ដានិតិសម្បទា ការបណ្ដុះបណ្ដាលវិជ្ជាជីវៈ ការរក្សាសន្តិសុខសណ្ដាប់ធ្នាប់នៅក្នុងពន្ធនាគារ ការងារកសិកម្ម សិប្បកម្ម ការអភិវឌ្ឍន៍ធនធានមនុស្ស និងការអភិវឌ្ឍន៍ហេដ្ឋារចនាសម្ព័ន្ធនានាប្រកបដោយភាពទទួលខុសត្រូវខ្ពស់។ ក្រៅពីនេះអង្គភាពក៏មានប៉ុស្តិ៍សុខភាពមួយខ្នងដែលគ្រប់គ្រងដោយអង្គភាពផ្ទាល់ នឹងមានផ្នែកសុខាភិបាលជាអ្នកទទួលខុសត្រូវ៕